സാമ്പാറില്‍ വാളന്‍പുളി എത്തിയ കഥ!

ഇലക്കറിയായി ഉപയോഗിക്കാവുന്ന ചായമന്‍സ എന്ന മെക്‌സിക്കന്‍ സസ്യം എനിക്ക് കിട്ടിയ കഥ മുമ്പ് എഴുതിയിരുന്നല്ലോ (https://goo.gl/nyZ0OW). അതിന്റെ മികച്ച സ്വാദ് അറിഞ്ഞ ശേഷം ആ സസ്യത്തെക്കുറിച്ച് കൂടുതല്‍ അറിയാനായി ശ്രമം. ഗൂഗിളിനെ മാത്രം ആശ്രയിക്കുന്നത് പലപ്പോഴും റിസ്‌കാണ്, അതിലും മികച്ച ചില സ്രോതസ്സുകള്‍ വേണ്ടിവരും. അങ്ങനെയാണ്, ഒരു ദേശീയ പണിമുടക്ക് ദിവസം കറിക്കുള്ള ചായമന്‍സ ഇലയും നടാനുള്ള ഏതാനും തണ്ടുകളും കടലാസില്‍ പൊതിഞ്ഞെടുത്ത് പ്രശസ്ത സസ്യശാസ്ത്രജ്ഞന്‍ ഡോ.കെ.എസ്.മണിലാലിനെ സന്ദര്‍ശിക്കാന്‍ ഞാന്‍ പോകുന്നതായി കാണപ്പെട്ടത്.

'ഹരിതഭൂപടം' എന്ന പുസ്തകം (https://goo.gl/3xS4Uq) ഞാനെഴുതിയത് ഹോര്‍ത്തൂസ് മലബാറിക്കൂസ് എന്ന പ്രാചീന സസ്യശാസ്ത്രഗ്രന്ഥത്തിന് രണ്ടാംജന്‍മം നല്‍കിയ ഡോ.മണിലാലിനെ നായകനാക്കിയാണ്. ആ പുസ്തകത്തിന്റെ കവറില്‍ വിചിത്രാകൃതിയുള്ള ഒരു പച്ചിലയുടെ ചിത്രം കവര്‍ ഡിസൈന്‍ ചെയ്ത മന്‍സൂര്‍ ചെറൂപ്പ ചേര്‍ത്തിരുന്നു. ഏതിലയാണതെന്ന് ഞങ്ങള്‍ക്കാര്‍ക്കും രൂപമുണ്ടായിരുന്നില്ല. പുസ്തകം കണ്ട മാത്രയില്‍ തന്നെ, ആ ഇല ജിന്‍കോ ബിലോബ (Ginkgo biloba) എന്ന സസ്യത്തിന്റേതാണെന്നും, ജപ്പാനിലെ ഹിരോഷിമയില്‍ ആറ്റംബോംബ് വീണ് എല്ലാം ഭസ്മമായ ശേഷം അവിടെ ആദ്യം മുളച്ചുവന്ന സസ്യം അതാണെന്നും, അതിനാല്‍ ഹോര്‍ത്തൂസ് രണ്ടാമത് പിറന്ന കഥയുടെ കവറാക്കാന്‍ അത് എന്തുകൊണ്ടും യോജ്യമാണെന്നും ഡോ.മണിലാല്‍ പറയുന്നത് അത്ഭുതത്തോടെ കേട്ടിരുന്ന അനുഭവം എനിക്കുണ്ട് (https://goo.gl/BlMUZW).

സ്വാഭാവികമായും ചായമന്‍സ കാണുമ്പോള്‍ അദ്ദേഹം എങ്ങനെ പ്രതികരിക്കും, ഈ സസ്യത്തെക്കുറിച്ച് അദ്ദേഹം മുമ്പ് കേട്ടിട്ടുണ്ടോ എന്നൊക്കെ അറിയാനുള്ള ആകാംക്ഷയിലായിരുന്നു ഞാന്‍. തണ്ടും ഇലയുമൊക്കെ നോക്കിയ ശേഷം അദ്ദേഹം അറിയിച്ചു: 'ഇല്ല, ഇത്തരമൊരു സസ്യത്തെക്കുറിച്ച് ഞാന്‍ കേട്ടിട്ടില്ല'. കേരളത്തില്‍ ചായമന്‍സ ഒരു പുതിയ സസ്യമാണെന്ന് ഇനി കൂടുതല്‍ തെളിവ് വേണ്ട - ഞാന്‍ മനസിലുറച്ചു.

ആ ചായമന്‍സ തണ്ടുകള്‍ ജോത്സ്‌ന ചേച്ചി അടുക്കളതോട്ടത്തില്‍ നട്ടു. കുറച്ച് മാസം കഴിഞ്ഞ് ഇലയെടുത്ത് കറിവെയ്ക്കാനും തുടങ്ങി. കഴിഞ്ഞയാഴ്ച ചായമന്‍സയെക്കുറിച്ച് 'മാതൃഭൂമി'യില്‍ എഴുതാന്‍ തീരുമാനിച്ചപ്പോള്‍ ഞാന്‍ ഡോ.മണിലാലിനെ വീണ്ടും വിളിച്ചു. ആരോഗ്യസ്ഥിതി മോശമാണെങ്കിലും, ചായമന്‍സയെക്കുറിച്ച് പറഞ്ഞപ്പോള്‍ അദ്ദേഹത്തിന് ഒരു ഉണര്‍വ്വ് വന്നു. 'ജോസഫ് അത് വളരെ യൂസ്ഫുള്‍ ആയ ഒരു സസ്യമാണ്. അതെപ്പറ്റി എഴുതൂ, കൂടുതല്‍ പേര്‍ അറിയട്ടെ, കൂടുതല്‍ പേര്‍ ഉപയോഗിക്കട്ടെ. നമ്മുടെ നാട്ടിന് പറ്റിയ ഒന്നാണത്'-അദ്ദേഹം പറഞ്ഞു.

ഞാനെഴുതിയത് (https://goo.gl/Oeo8OX) വായിച്ച് ചിലരെങ്കിലും ഒരു വിദേശസസ്യം നമ്മുടെ നാട്ടില്‍ എത്തുന്നത് അപകടമാണെന്ന് കാട്ടി കമന്റിട്ടു. ഗോള്‍ഡ് ഫിഷ്, ആഫ്രിക്കന്‍ മഷു, ആഫ്രിക്കന്‍ പായല്‍ തുടങ്ങിയവ പോലെ ചായമന്‍സയും നമ്മുടെ പരിസ്ഥിതിക്ക് ദോഷമാകില്ലേ എന്നാണ് ഒരാള്‍ ചോദിച്ചത്. ജൈവഅധിനിവേശവും കാര്‍ഷികവൃത്തിയും തമ്മിലുള്ള വ്യത്യാസം മനസിലാക്കാതെയാണ് ഇത്തരം അഭിപ്രായങ്ങള്‍ വരുന്നത്. കപ്പയും ചേനയും പപ്പായയും പച്ചമുളകുമൊക്കെ അന്യനാടുകളില്‍ നിന്നെത്തി നമ്മുടെ ഭക്ഷ്യവിഭവങ്ങളായ സസ്യങ്ങളാണ്. കാര്‍ഷികവൃത്തിയുടെ ഭാഗമായി എത്തിയവ. ചായമന്‍സയും അങ്ങനെ തന്നെ. കര്‍ഷകര്‍ നട്ടാലേ അവ വളരൂ. എന്നാല്‍, ആഫ്രിക്കന്‍ പായല്‍ പോലുള്ളവ അധിനിവേശയിനങ്ങളാണ്. അവയെ ആരും നടേണ്ട കാര്യമില്ല. ആവാസവ്യവസ്ഥകളില്‍ കടന്നുകയറി തനിയെ പെരുകി നാശംവിതയ്ക്കും.

Basavangudi Gundappa Lakshminarayana Swamy (1916-1980) എന്ന സസ്യശാസ്ത്രജ്ഞനെ പരിചയപ്പെടുത്തിക്കൊണ്ട്, ഡോ.മണിലാലിന്റെ ശിക്ഷ്യനും ലോകപ്രശസ്ത ഓര്‍ക്കിഡോളജിസ്റ്റുമായ ഡോ.സി.സതീഷ് കുമാര്‍ ഇന്നലെയിട്ട എഫ്ബി പോസ്റ്റ് (https://goo.gl/Dj5XxL) വായിച്ചപ്പോഴാണ് മേല്‍സൂചിപ്പിച്ച സംഗതികള്‍ മനസിലെത്തിയത്. കര്‍ണാടകത്തിലെ പ്രശസ്്തനായ എഴുത്തുകാരന്‍ കൂടിയായിരുന്നു ഡോ.സ്വാമി. നമ്മുടെയൊക്കെ ഭക്ഷണത്തില്‍ എത്രമാത്രം വിദേശസാന്നിധ്യമുണ്ടെന്ന് ആധികാരികമായി പഠിച്ചെഴുതിയ ശാസ്ത്രജ്ഞനാണ് അദ്ദേഹം. Namma Hotteyalli Dakshina America - South America in our Stomach എന്നത് അദ്ദേഹത്തിന്റെ പ്രസിദ്ധമായ കൃതിയാണ്.

ആ പുസ്തകം പരിചയപ്പെടുത്തിക്കൊണ്ട് ഡോ.സതീഷ് കുമാര്‍ എഫ്ബി പോസ്റ്റില്‍ എഴുതുന്നു:

'സത്യമാണ്, ഇക്കാലത്തിനിടെ വ്യത്യസ്തമായ ഒട്ടേറെ പച്ചക്കറികളും പഴങ്ങളും നമ്മുടെ ദൈനംദിന ഭക്ഷണത്തിന്റെ ഭാഗമായി മാറിയിട്ടുണ്ട്. കാബേജ്, കാരറ്റ്, കോളിഫഌര്‍, ബീറ്റ് റൂട്ട്, മുള്ളങ്കി അങ്ങനെ ഏതുമെടുത്തോളു, ഇവയെല്ലാം പുറമേ നിന്നെത്തിയവയാണ്. മഡഗാസ്‌കര്‍ സ്വദേശിയായ വാളംപുളി കഴിഞ്ഞ 350 വര്‍ഷമായി എങ്ങനെ നമ്മുടെ സാമ്പാറിന്റെ സ്വാദ് കൂട്ടുന്നു എന്നാലോചിച്ചു നോക്കുക! അതിന് മുമ്പ് കുടംപുളിയാണ് നമുക്കുണ്ടായിരുന്നത്. നിങ്ങള്‍ ഏത് പച്ചക്കറി എടുത്തോളൂ, അതിന് താത്പര്യജനകമായ ഒരു കഥ പറയാനുണ്ടാകും. തിരിച്ചറിയാന്‍ കഴിയാത്തവിധം അതിവിടെ സ്വദേശിയായി മാറിയിട്ടുമുണ്ടാകും. ഇത് ലോകത്തെല്ലായിടത്തും സംഭവിക്കുന്നുണ്ട്.

അന്യനാട്ടുകാരായ സസ്യങ്ങളുടെ ഈ ആധിക്യത്തിനിടെ ആഗോളവിപണിയില്‍ ചുവടുറപ്പിച്ച ശരിക്കും ഇന്ത്യന്‍ സ്വദേശിയായ ഒരു പച്ചക്കറിയുണ്ട്. അതിന്റെ വന്യബന്ധുക്കളെ ഇപ്പോഴും രാജ്യത്തിന്റെ വടക്കുകിഴക്കന്‍ മേഖലയില്‍ കാണാം. വളരെ സവിശേഷതയാര്‍ന്ന ആ വെജിറ്റബിള്‍ വഴുതനയാണത്. കത്രിക്ക, വഴുതനങ്ങ തുടങ്ങി പല വകഭേദങ്ങളായി അവ കാണപ്പെടുന്നു.

രാജ്യത്തിന് വെളിയില്‍ ദീര്‍ഘസഞ്ചാരത്തിന് പോകുന്ന പലരും ഉപയോഗപ്രദമായ പല സസ്യങ്ങളെയും നമ്മുടെ നാട്ടിലെത്തിച്ചിട്ടുണ്ട്. അവ നമ്മുടെ ഭക്ഷണപ്ലേറ്റുകളെ അനുഗ്രഹിക്കുന്നുമുണ്ട്. സമീപകാലത്ത് ഒട്ടേറെ ഫലവൃക്ഷങ്ങള്‍ മലേഷ്യയില്‍ നിന്ന് ഇവിടെയെത്തിയിട്ടുണ്ട്, അവ നന്നായി ഫലം തരികയും ചെയ്യുന്നു. നമ്മുടെ ഭക്ഷണക്കുട്ടയെ സമ്പുഷ്ടമാക്കാനും വൈവിധ്യപൂര്‍ണമാക്കാനും ലോകത്തിന്റെ പല ഭാഗങ്ങളില്‍ നിന്ന് മികച്ച സസ്യങ്ങളെ ഇവിടെ എത്തിക്കുന്നത് നമ്മള്‍ തുടരണം. ചായ ചെടിയെ (Cnidoscolus aconitifolius) കുറിച്ച് അടുത്തയിടെ വന്ന രചനകള്‍ ഈ പരിപ്രേക്ഷ്യത്തില്‍ വേണം നമ്മള്‍ കാണാന്‍'.

(Note: ചായ ചെടി (Chaya Plant) എന്ന് മായന്‍ വര്‍ഗ്ഗക്കാര്‍ വിളിക്കുന്ന സസ്യത്തിന് നാല് വകഭേദങ്ങളുണ്ട്. അതില്‍ മെക്‌സിക്കോയില്‍ കാണപ്പെടുന്ന വകഭേദമാണ് ചായമന്‍സ).
#Chayamansa

Photo
Shared publiclyView activity