Profile

Cover photo
موسوعة الشعر السوداني
301 followers|12,374 views
AboutPostsPhotosVideos

Stream

 
باسم الحاضر والمستقبل

ست الدار بت أحمد قالت :

ليك يا الزين ود حامد شوقنا

أما بعد ،

المبعوتة المنك .. وصلت

ورُح فكيت الطلب الفوقنا

باقي الدين يا الزين خلصتو

قدر الفاضل .. مصروف راشد والتومات

والجايات من جاي .. لا جاي

زي ما قت لك قبال ده

شهر إتنين حا نطهر راشد

شهر إتنين المدرسة تأجز

الله يبعد العارضي تجينا

وراشد حالف ما يطهر

إلا أبوهو وعمتو تحضر

وإلا يجيبو الغنايين

شان الشوق بت سرنا ترقص

قلنا نجيب المداحين

طنطن .. أنا جاي من الحج

وعارف راشد لما يطنطن

كل الدنيا الفيي تطنطن

غايتو بشر .. بس ربو يهون

ما كلمتك بالتومات

أول البارح جني يرطنن

قالن نحنا الخواجات

بسم الله .. مرق حصلت

لقيت لك جعفر زارد البيت بالخواجات

يبقى حداشر وخواجية

ناس البلد الكسرو عليهن

صدو يقلبو في إيديهن

عدمانين من إسم حكيم

ولا خبيراً للمشروع

علماء آثار .. فضلت في آثار

ما خموها الجونا قبلكن

شن خلولنا بلا حجار

الله يصرف الخواجات

بينات جعفر والمحجوب

والمحجوب والخواجات

طقت حجي .. العمدة طفاها

باقي الناس الجات للفرجي

قنبو قيلو شبعو لحوم ..

والخواجة يصور ساكت

ستة خرفن وتيس ما كفن

ستة خرفن في فد يوم

المعدوم أشكال وألوان

أي خدار في اليوم داك في

كملن رف كمين دكان

أول كفو الخواجات

بعدو العمدة وصمد الساقية

ناس المجلس والمشروع

بعدو الطلبة وباقي الناس

حتى الشفع والحروم

ستة خرفن وتيس إنصفن

ستة خرفن في فد يوم

جات من صالح بت كلتوم

تسكت تخبز طول اليوم

لمن حرقت الدولاب

قنبت المسكينة تدعي

الله يصرف الخواجات

غاية الليلة السقا يشولق

واطات الله دي ست رشاها

ما في غنوتاً ما غناها

ما في مدحتاً ما سواها

حمارو صبح لحق أمات طه

سب الدين والأمريكان

جنس بدع

زولك ده يحير

عند الجد كان أده ينقنق

عند الفارغة يشيل ويبعزق

إذكرت كلامك ليا ..

إنو في ناس لاعبين بالدين

وناس لاعبابا الأمريكان

الله يصرف الأمريكان

الله يصرف الصرفيكان

ما خلوني نشدتك منك

كيفن حالك والخرتوم

كيف المصنع والعمال

حالم لسع نفس الحال ؟

وما رقوك سووك باشكاتب ؟

يورينا الله زيادة الراتب

كيف الناس والحالة عموم ؟

والعزابة الكحيانين

سيد البيت عل ما زكاكم

لسع تقعو تقومو براكم ؟

قلبي معاكم

ربي يخدر عود ضرعاتكم

بالي معاك يا الزين ود حامد

بالي هناك والشوق الشوق

خلى شدير الجوف محروق

راجي مطيرة الزين ود حامد

نحنا نصاحاً زي واطاتنا

نحنا نصاح إلا القراص والتجار

والحاصل البحصل كل صباح

شتلاتك قبضن

الحملان كبرن بلحيل

العضمين الروكة إنزرعن

اوعك تشفق من تالانا

ولا نبقالك مشغولية

زيك واحد مستورين

وما ناسين المسئولية

هي يا الزين زغرد

بت ام زين جابت لها بت

ستة أولاد حتان البت

المحجوب ينشد من خبرك

شافعو محسب من يومين

التومات طيبات ونصاح

إلا غباش بلحيل آ الزين

راشد كرر .. شهر اتنين

كان ما جيت أنا ما بطهر

الله يبعد العارضي تعال

كان فد دور يدوك يا تعال

كان بالخصم إن شاء الله تعال

وما تتوصى .. وداعة الله

أوعى البشغل والعربات

والحيكومة السمها فاير

أم أولادك ست الدار بت أحمد جابر
[ محمد الحسن سالم حميد ]
 ·  Translate
11
3
Osman Osman's profile photoMozamel sd's profile photoالسودان الجديد's profile photoNaji Faisal's profile photo
6 comments
 
رحمك الله حبيبى حميد . الزيك قلال ياطينة الصبر . والناس الكتر . والنخل الطوال .
 ·  Translate
Add a comment...
Have them in circles
301 people
‫خالد شاهين‬‎'s profile photo
ibo kurdish's profile photo
‫اديان الكتلونيه‬‎'s profile photo
Jabo Harin's profile photo
fatma mhfooz's profile photo
‫حسين صلاح‬‎'s profile photo
Adel Ali's profile photo
Aamer Abd's profile photo
mohammed Gumaa's profile photo
Story
Tagline
موسوعة الشعر السودانCategory:Entertainment & Arts - Books & أكبر موقع للشعر السوداني والشعراء السودانين-حيث ان كل شاعر يمتلك موقع خاص به ومكتبه خاصه بدواوينه واعماله الشعريه ومجله خاصه بالتحديثات والجديد لكل شاعر
Introduction
الآن بامكان كل شاعر ان يمتلك موقع خاص به على موسوعه الشعر السوداني مع الاداره الذاتيه الكامله
http://www.sudanpoem.net/
Contact Information
Contact info
Email